200 burra ndërruan bojë - nga Kol Shkodrani

200 BURRA NDËRRUAN BOJË

Nga: KOL SHKODRANI

Ah, moj Politikë mizore,

pak na u duke shumë na dole

me 200 sokola burra

nga llogorja në llogore. 

 

Ushton zani për kala

ushton thirrja deri në Gur të Zi

raskapitur prej miklimit

200 burra ndrruan parti.

 

200 blu kaluan në rozë

ndrruan bindje e qellim

të pakënaq nga politika

që s’u solli një fitim.

 

Kcen Nasipi, kcen Lefteri 

i merr në gji partia nanë

dje i kishte LSI-ja
tash në PS bukën e hanë.

E hanë bukën me simite
sa tu mbushet gryka
dridhe, dridhe në dy karrike
der sa të çahet bytha.

Ka të tjerë, plot të tjerë,
kavaljere e dama
që lazdrohen n' parti t'reja,
dajres i bie Rama.

 

Jemi popull me shumë halle

na del shpirti për gazep

këta me politikë të madhe

e ndjen veten si një mbret.

 

Tue kërku t'drejtat tona

plasi shpirti, u ça goja

duam punë e duam bukë

këta na thonë hani bombona.

 

Ju ju raftë pika mbas veshit

si na latë si mos o Zot

tash na thirrni të hedhim votën

por, po lodheni krejt kot.

 

Se politikarët e preshit

s’ja qajnë hallin Kolës,Lleshit,

rrinë mendojnë për ca projekte

si e si ta mbushin xhepin.

 

Kanë pallate, kanë vetura

diplomatë u bënë këta burra

medemek se hyjmë në Europë

popullin mjelin si lopë.

 

Dridh-përdridhu politika

si në pazar të gjësë së gjallë

më jep një pelë e të jap dy mushka

deputet ti kesh për sallë.

 

I kanë vënë popullit kapistër

e ja hipin si gomari,

ush përpara, ec o popull

der sa të dalë shpirti për së gjalli.